
أول سؤال لازم تجاوب عليه قبل أي إعلان: إحنا بنستهدف مين؟ لو الإجابة “أي حد ممكن يحتاجنا”، الإعلانات هتتكلم مع الكل، ومحدش هيحس إنها بتكلمه هو.
المقال ده بيشرح إزاي تحدد الفئة المستهدفة بـ 4 أسئلة، وإزاي تكتب تعريفها في جملة واحدة، مع مثال حقيقي من شغلنا وأمثلة من مجالات مختلفة.
4 أسئلة تحدد بيها الفئة المستهدفة
- Massive Pain: هل المشكلة مهمة كفاية إن الناس تدفع لحلها؟
- Purchasing Power: هل يقدروا يدفعوا السعر اللي يخلي خدمتك مجدية؟
- Easy to Target: أقدر ألاقيهم وأوصل لهم فين؟
- Growing: هل حجم السوق وشريحة العملاء بيكبر ولا بيقل؟
ليه وجود مشكلة لوحده مش كفاية؟
إن يكون فيه مشكلة ده لوحده مش كفاية. ممكن ناس محتاجة خدمتك جدًا، لكن مش قادرة تشتريها. وممكن ناس معاها فلوس، لكن المشكلة مش أولوية عندها.
علشان كده بتحط كل شريحة على الأسئلة الأربعة مع بعض، مش على سؤال واحد. الشريحة الصح هي اللي عندها مشكلة مؤلمة، وتقدر تدفع، وتقدر توصلها، وبتكبر.
اكتب تعريف الفئة المستهدفة في جملة واحدة
في المرحلة دي لازم تطلع بجملة واحدة فيها تعريف الفئة المستهدفة:
إحنا بنخدم [نوع عميل محدد]، في مرحلة [وضعه الحالي]، بيعاني من [مشكلة مؤلمة]، وعايز يوصل لـ [نتيجة]، وعنده [متطلبات الاستفادة والشراء]، ونقدر نوصله عن طريق [قنوات واضحة].
لو مش عارف تكمل أي جزء في الجملة دي، يبقى ده الجزء اللي محتاج تفهمه عن عميلك قبل ما تصرف على الإعلانات.
مثال حقيقي: Gym بعرض 8-Weeks Reshape Program
Gym بيدرب الناس في أرض مفتوحة في النوادي، وكانت إعلاناته بتقول “إحنا Gym بنساعد الرياضيين على تحسين لياقتهم البدنية” وفشلت. لما قارنا بين شريحتين، رياضيين بيدخلوا بطولات، وناس مش رياضيين عايزين يستعيدوا لياقتهم، طلعت الشريحة التانية هي الأنسب لأن الاحتياج عندها أعلى.
Gym (مثال حقيقي)
إحنا بنخدم ناس مش رياضيين، في مرحلة إن لياقتهم قلّت وبعدوا عن الرياضة، بيعانوا من إنهم بينهجوا وهما طالعين السلم، أو ركبهم وضهرهم بيوجعوهم من القعدة على المكتب، وعايزين يوصلوا لـ إنهم يستعيدوا لياقتهم البدنية، وعندهم قدرة يدفعوا اشتراك برنامج 8 أسابيع ويلتزموا بمواعيد التمرين، ونقدر نوصلهم عن طريق إعلانات بتعرض عليهم Physical Assessment مجاني.
النتيجة في أول أسبوع: حوالي 100 Lead بتكلفة حوالي 40 جنيه للـ Lead، و20 عملوا الـ Assessment، و10 اشتروا الـ Program. التفاصيل في دراسة الحالة.
مثال حقيقي تاني: بيع ملابس بالجملة
جملة ملابس (من دراسة حالة Section)
إحنا بنخدم أصحاب محلات الملابس الرجالي، في مرحلة إنهم بيدوروا على بضاعة تميز محلهم، بيعانوا من إن البضاعة اللي في السوق شبه بعض، وعايزين يوصلوا لـ موديلات جديدة يبيعوها في محلاتهم، وعندهم قدرة يشتروا بكميات، ونقدر نوصلهم عن طريق إعلانات بتكلم صاحب المحل، وقناة تليجرام بيشوفوا فيها الموديلات الجديدة ويطلبوا بالكود.
الإعلانات كانت بتجيب ناس عايزة قطعة أو اتنين، لأن الرسالة كانت بتكلم اللي هيلبس مش صاحب المحل. التفاصيل في دراسة حالة Section.
أمثلة من مجالات تانية
الأمثلة دي توضيحية علشان تشوف الجملة شكلها إيه في بيزنس مختلف. كل بيزنس لازم يجاوب على الأسئلة الأربعة بأرقامه وعملائه هو.
معرض عربيات
إحنا بنخدم أفراد بيدوروا على عربية، في مرحلة المقارنة بين موديلات وأسعار، بيعانوا من إنهم مش عارفين يثقوا في أنهي معرض، وعايزين يوصلوا لـ عربية مناسبة بسعر وطريقة دفع واضحين، وعندهم مقدم أو قدرة على التقسيط، ونقدر نوصلهم عن طريق إعلانات في منطقة المعرض وفريق مبيعات بيرد بسرعة.
شركة B2B بتبيع لشركات
إحنا بنخدم مديري مصانع أو شركات، في مرحلة إنهم بيدوروا على مورّد أو حل لمشكلة في التشغيل، بيعانوا من تكلفة أو وقت ضايع بيأثر على الإنتاج، وعايزين يوصلوا لـ تشغيل أوفر وأسرع، وعندهم ميزانية وصلاحية اتخاذ قرار، ونقدر نوصلهم عن طريق LinkedIn، والبحث على جوجل، وفريق مبيعات بيتابع.
شركة تدريب أو كورسات
إحنا بنخدم موظفين أو أصحاب شركات صغيرة، في مرحلة إنهم عايزين يطوروا مهارة معينة في شغلهم، بيعانوا من إنهم مش بيتقدموا أو مش عارفين يطبقوا، وعايزين يوصلوا لـ نتيجة يقدروا يقيسوها في شغلهم، وعندهم القدرة يدفعوا تمن البرنامج والوقت يحضروه، ونقدر نوصلهم عن طريق محتوى بيشرح المشكلة وإعلانات بتعرض جلسة أو تقييم مجاني.
مطعم دليفري
إحنا بنخدم ناس ساكنين أو شغالين في منطقة التوصيل، في مرحلة إنهم بيقرروا هياكلوا إيه النهارده، بيعانوا من إنهم زهقوا من نفس الاختيارات أو التوصيل بيتأخر، وعايزين يوصلوا لـ أكل حلو يوصل بسرعة، وعندهم القدرة يطلبوا أونلاين، ونقدر نوصلهم عن طريق إعلانات في نطاق التوصيل وتطبيقات الطلب.
الخلاصة
قبل ما تكتب أي إعلان، حط الشرايح اللي ممكن تشتغل عليها على 4 أسئلة: المشكلة مؤلمة؟ يقدروا يدفعوا؟ تقدر توصلهم؟ والسوق بيكبر؟ وبعدين اكتب تعريف الفئة المستهدفة في جملة واحدة. الجملة دي هي اللي بيتبني عليها العرض، والرسالة، والقنوات.
ده أول جزء في خدمة الـ Performance Marketing في MARJIN، والتفاصيل في منهجيتنا. وممكن تقرأ كمان إزاي تحسب تكلفة اكتساب العميل. ولو حابب نحدد مع بعض الفئة المستهدفة لشركتك، في مكالمة مدتها 45 دقيقة بنفهم البيزنس الأول، وبعدها نحدد إذا كنا مناسبين للشغل مع بعض.
خدمات مرتبطة: Media Buying · إعلانات سناب شات · تسويق B2B
FAQ
أسئلة شائعة
يعني إيه الفئة المستهدفة؟
هي الشريحة من العملاء اللي البيزنس هيركز عليها في التسويق والمبيعات: ناس عندهم مشكلة مؤلمة خدمتك بتحلها، ويقدروا يدفعوا، وتقدر توصلهم.
إزاي أحدد الفئة المستهدفة لمشروعي؟
حط كل شريحة على 4 أسئلة: هل المشكلة مهمة كفاية إنهم يدفعوا لحلها؟ هل يقدروا يدفعوا السعر؟ تقدر توصلهم فين؟ وهل السوق بيكبر ولا بيقل؟ وبعدين اكتب تعريفها في جملة واحدة.
ينفع أستهدف أكتر من شريحة؟
ينفع، بس كل شريحة محتاجة رسالة وعرض مناسبين ليها. لو بتبدأ، ابدأ بالشريحة اللي احتياجها أعلى وتقدر توصلها بسهولة.
هل وجود مشكلة عند العميل كفاية؟
لأ. ممكن ناس محتاجة خدمتك جدًا لكن مش قادرة تشتريها، وممكن ناس معاها فلوس لكن المشكلة مش أولوية عندها.